RSS

Arquivo da categoría: Lingua Galega

Festival Letras Galegas

manuel maria

O vindeiro venres, día 20, celebraremos o Festival das Letras Galegas. O homenaxeado neste ano é o escritor chairego Manuel María, autor dunha prolífica obra na que deixou constancia do seu compromiso coa nosa terra e coa nosa lingua.

Nestas ligazóns podedes acceder aos audios da nosa aportación ao festival.

Quen puidera namorala

Deitado frente ao mar

 
2 Comentarios

Publicado por o 15/05/2016 en É noticia, Libros, Lingua Galega

 

O teatro

Repasa o estudado na clase sobre o teatro, as súas características e elementos, a Xeración Nós e os aspectos máis destacados da obra de Castelao coa presentación que elaborou e desenvolveu Alba na aula.

 
3 Comentarios

Publicado por o 03/03/2015 en Aula, Lingua Galega

 

Oficios tradicionais galegos

Para completardes o traballo que estades a facer sobre os oficios tradicionais de Galicia podedes visitar tamén a páxina web do Museo do Pobo Galego (Santiago), que alberga, entre outras, unha exposición permanente sobre os oficios. Alí tedes información e fotografías moi interesantes sobre o tema pero hai moito máis. Máis interesante sería aínda que o visitarades persoalmente cos vosos pais se aínda non o fixestes.

Máquina de afiador

 
1 comentario

Publicado por o 13/03/2014 en Fotos, Lingua Galega

 

Palabras de auga

DSC05305

Onte estivo con nós Marcos Calveiro, Premio Merlín de Literatura Infantil 2012, polo seu libro Palabras de auga, con quen compartimos unha entretida sesión que nos serviu para coñecer máis en profundidade a cruel realidade dalgunhas tribus africanas coma a que se menciona no texto, que teñen que loitar pola súa supervivencia contra a fame, a explotación e a guerra. Unha realidade actual, á que lle damos as costas, mirando para outro lado e facendo oídos xordos dende a nosa atalaia de privilexio. Palabras de auga que desexamos que sexan de esperanza e de concienciación diante dunha realidade que nos pode parecer moi lonxana pero que está aí, ao noso carón.

DSC05295

 
2 Comentarios

Publicado por o 09/05/2013 en Aula, Fotos, Libros, Lingua Galega

 

Encontro con Xosé Neira Vilas

Con motivo da exposición “Querido Balbino, 50 anos de Memorias dun neno labrego” no Multiúsos de Rois, tivemos ocasión de facer un percorrido pola vida e obra de Xosé Neira Vilas, coñecer a fondo a Balbino e, sobre todo, compartir as experiencias e ilusións deste escritor que aos seus 84 anos desprende vitalidade e atópase moi cómodo diante de rapaces coma nós.

IMG_0436_50p

 
3 Comentarios

Publicado por o 06/05/2013 en Aula, É noticia, Fotos, Lingua Galega

 

O Magosto

Para saber un pouco máis sobre a celebracion do Magosto, a castaña e o castiñeiro.

 

17 de maio. De Rosalía a Pereiro

Lois Pereiro

Hoxe conmemoramos en Galicia o Día das Letras Galegas, adicado este ano a Lois Pereiro, poeta monfortino falecido prematuramente hai agora 15 anos. Xa nos achegamos á súa figura e á súa obra na aula e coñecemos bastantes cousas del. O mesmo fixemos o ano pasado con Uxío Novoneira, hai dous con Ramón Piñeiro e así dende 1963 en que a homenaxeada foi, como non, Rosalía de Castro.

O día 17 de maio de 1863, Rosalía de Castro asinou a dedicatoria a Fernán Caballero do seu libro “Cantares Gallegos” e foi o académico Fernández del Riego quen propuxo a conmemoración do Día das Letras Galegas nesta data na que se cumprían os 100 anos da publicación do libro. Dende aquela, cada ano vense celebrando este día dun xeito especial e lémbrase en cada ocasión a un autor diferente.

Dende Rosalía, pasando por Castelao, Pondal, Curros, Otero Pedrayo, Cunqueiro, Fole… ata Lois Pereiro, neste 2011, esta é unha homenaxe a todos os que fixeron grande a nosa cultura e a nosa lingua. Disfrutémolo.

 
2 Comentarios

Publicado por o 17/05/2011 en Aula, É noticia, Lingua Galega

 

Salvar un libro

Dentro das actividades promovidas pola Biblioteca do centro, participamos nunha actividade conxunta que están a levar a cabo tódolos centros incluídos no Plambe de Bibliotecas Escolares, entre os cales nos atopamos. A actividade chámase “Salvar un libro da literatura galega” e está inspirada no libro Fahrenheit 451“. Se alguén neste momento quixese queimar tódolos libros en galego que hai no mundo, cal salvariamos nós?

Contos por palabras

Pois ben, a elección maioritaria na aula de 5º foi “Contos por palabras”, de Agustín Fernández Paz e ilustracións de Enjamio. É un libro que consta de once relatos moi diferentes entre si, pero que teñen unha orixe común: todos eles naceron a partir dalgún dos anuncios por palabras que atopamos a diario nos xornais. Nel podemos atopar unha galería de personaxes moi variada: un unicornio solitario, un Spiderman moi habelencioso, un home lobo namorado, un león con alopecia… O libro, que conta xa con vinte anos de vida e recibiu o  Premio Lararillo 1990 e foi incluído na International Honour List do IBBY de 1992, segue desprendendo frescura, fantasía e humor.

 
1 comentario

Publicado por o 04/05/2011 en Aula, Libros, Lingua Galega

 

23 de abril, Día Internacional do Libro

Día do Libro

Hoxe celébrase o Día Internacional do Libro e dos Dereitos de Autor, que ten como obxecto o fomento da lectura, da industria editorial e da protección da propiedade intelectual. A súa orixe remóntanse ao ano 1930 aínda que foi promulgado a nivel internacional pola Unesco en 1995 e en 2001 Madrid foi a capital mundial do libro. Escolleuse esta data porque un 23 de abril de 1616 faleceron Miguel de Cervantes, William Shakespeare e Garcilaso de la Vega. Tamén faleceron  nesta data, aínda que en diferentes anos, outros escritores recoñecidos como William Wordsworth (1850) e Josep Pla (1981).

Así pois é unha data para celebrar e que mellor maneira que adicar unhas horas á lectura. Iso si, calquera día do ano é bo para ler porque xa sabes que un libro é un extraordinario compañeiro.

Se queres saber máis, pica aquí.

 

Visita aos muíños de Seira

Moi interesante e didáctica resultou a visita de onte aos muíños de Seira. Nina explicounos con detalle tódolos aspectos relacionados con estas construcións que tiveron unha enorme importancia económica e social na vida da Galicia rural. Dende hoxe, palabras para nós descoñecidas como moega, capa, lovada, rodicio, segorella, ra… xa forman parte do noso vocabulario. Nas nosas mans está conservar e transmitir esta riqueza que segue presente na memoria dos máis vellos para que cando eles non estean non queden no esquecemento.

O muíño roula, roula,
o muíño roulador.
Volta as augas do regato
en marmurio cantador.
 
O muíño roula, roula,
e non deixa de roular,
e coas augas do regato,
o rodicio fai cantar.
 
4 Comentarios

Publicado por o 12/04/2011 en Aula, Fotos, Lingua Galega